Erinnerungen vorgetragen im “Club Alter Bramstedter”
De Bimöhlerstroot
Wenn man de Geschich vun uns Stadt bit hen üm 813 trüüch verfulg’n kann un Weet, dat dot Dörp Bimöhl’n 800 Johr old is, kunn man meist meen, dat door jümmers een Wich ween is.
Warrt jo annohm’n, dat de Aposten des Noord’ns Ansgar hier üm diss Tied al de eerst Kark op’n Kapell’nhoff buut hett. Villicht vertellt uns ja da Fluurstück’nnoom un de Beteeknung „Hoff Kark’ndamm“ wat ut düss Tied.
To mien Kinnertied, meen ik, weer de Bimöhlerstroot no een Grandchaussee un op beid Sied’n stünn Obstbööm.
Mit de Bebuung vun de Bimöhlerstroot füng an üm de Johrhunnertwenn (1900). Welk Bramstedter hebbt sik door ehr Hüüs buut.
Liek achter’n Bohnövergang vun de AKN steiht no dat Huus vun Lud’n Saggau. An 15.09.1908 hett Lihrer Saggau dat Grundstück vun Hufner Geerth köfft.
Wull no veele in dis Ruum is Lud’n Saggau, sien Dochter Olga un Käthe in Erinnerung. Ik heff na bi Lud’n, in de Kriegstied to School goh’n un heff mit em an’t olle Sprütt’nhuus den ümgang mit de Gasmask, mit de Füürpatsch, un mit Füürsprütt, as sößjöhrige öövt,
Olga weer jo Schauspeelerin an de Lübecker Büh’n, meist in plattdüütsche Mundoort. Käthe weer Sekretärin an de Jürg’n-Fuhlendörp-School.
Liek achter dat Saggausche Huus harr de Muurmeister Krumlinde an 18.06.1906, dat Grundstück vun Hufner Geerth köfft und dor sien Wahnhuus un sien Muurbedreev opbuut. Bekannt schull uns no Rudel Krumlinde sien. He weer ünner Börgermeister Gebhardt, de Chef in’t Buuamt. He harr na een Brooder, de hett doormools för Bäcker Sievert, mit Peerd uni Woog’n dat Broot utföhrt.
De Bebuung in de Bimöblerstroot wehr bannig wietlööpig. An 02.03.1912 verköfft de Wittfruu Thies een Grundstück an den Breefdreeger Fehrs, de door sinn Huus buut. Ik erinner mi an Walter Fehrs, de weer bi de Reichspost as Stripp’ntrecker bi’n Fernmelltrupp un Telefondeenst. Sien Swester Olga weer’n hart’nsgooda Froo un hees bi uns Jungs „Fruu vun Ribbeck“ in Anlehnung an dat Gedicht wat wi jüst in de School lihrt harr’n: Vun Ribbeck vun Ribbeck in’t Havellann. Nau wi in dat Gedicht lüücht’n de Appeln, Birn un Plum in de Harvsttied an de Bööm an Stroot’nrand un se harr jümmers för uns dat Fallobst opsammelt un wenn wi to Fell tröck’n gev se uns dat Obst.
Denn kummt de Schnoorsche Villa. Buut etwa anfang de dörtiger Johr’n. Hermann un Otto Schnoor harr’n in Lannwich een Buugeschäft. Se hebbt in 18 Maande dat „Nee’e Kurhuus“, üm 1929 buut un vun Gewinn twee prächtige Vill’n buut.
Twisch’n dis un dat nächst Huus mutt fröher de Groot’nasperwich hendool gohn sien, de dörch’n Buu vun de AKN oplööst wurrn is. Jedenfalls bekeem Buur Steffen vun Fleck’n een Stück Lann övareeg’n, weer’n nur ein poor Quadrotmeter, de schöllt ober meist neegentig Johr looter een lüürlütt Rull speel’n. An 11.10.1905 köfft Muurmeister Graf de Koppel vun Hufner Steffen, ober dat lütt Stück Land blivt in Besitz von Hufner Steffen. Neegentig Johr looter bekommt Günter Steffen een Reek’n vun de Stadt. He schall för de poor Meter, Stüür’n un Afgoov’n betohl’n.
Muurmeister Graf hett dat Doppelhuus buut un verköfft dat an 25.07.1907 an Lihrer Trippe. Lihrer Trippe hett in Bramstedt een Baamt’nvereen un denn Verein för Kriegerheimstätten gründ’t.
An 15.06.1918 bekummt Lihrer Saggau, Muurmeister Krumlinde, Lihrer Trippe, Postbeamter Fehrs, Wittfruu Thies, Wilkens, Freudenthal un Kiel een Ennschädigung vun de AKN.
Dat nächste Huus hett de Danzlihrer Humfeld buut. Dat Grundstück hett he an 06.11.1911 vun Hufner Steffen köfft. Twee Johr looter verköfft Humfeld sien Huus an Mokler Dibbern, de dat Huus wieder an den Postoberassiestent’n Müller verköfft. In dis Huus hett denn to mien Kinnertied een Fruu Hohn bin wohnt.
Dat nächst Huus is wedder een vun de Schnoorschen Hüüs, woneem ik al vun vertellt heff.
över dat grood Bohnsacksche Huus givt nich veel to vertell’n. Kummt wi nu to de Villa de Wilkens buut hett.
Wilkens harr üm dis Tied op’n Slüüskamp de Wussfabrik buut un hier dis Villa.
Mi is bekannt, dat in dis Huus de Lihrer Steen wahnt hett.
Dat nächst Nuus bett Korl Mohr üm 1920 buut. In sien Oort speel Korl Mohr jümmer. den erfolgriek’n Hamborger Köpmann. Mit sien Elvsegler op’n Kopp un sien hamborger Snack wull he dat weet’n. Bekannter un erfolgrieker weer sien Jung Korl Mohr junior. In de fövtiger Johrn buu he in de Bimöhlerstroot sien Kook’nfabrik. De Renner weern sien „Helgolänner Bruunkook’n.“
Kummt wi nu an’t letzt Huus in de Bimöhlerstroot, to linker Hann.
De Vadder vun den uns na bekannt’n Klempner Hein Kiel harr in’t Johr 1913 dat Grundstück vun Fuhrünnernehmer Dehn köfft un door een Huus in markwürdig’n Stil buut. Seh so’n beet’n mit sien Zinn un Törms wi ne Borg ut.
De Swester vun Kiel weer in Krieg in Hamborg utbommt, de Familie Schmeis harr sik op Grundstück een smuckes Holthuus buut.
Beid‘ Hüüs sünd in de söventiger Johr’n afreet’n wurm.
Jo Lüüd, dat weert för hüüt. Bi uns nächst Dreep’n goh ik vun Bimöhl’n trüüch na Bramstedt hento un vertell ju wat vun de Hoffstell Kark’ndamm un de Hüüs op de rechte Sied vun de Bimöhlerstroot.