Erinnerungen vorgetragen im “Club Alter Bramstedter”
De Hamborger Straat
von Hans-Georg Koch
De Hamborger Straat – vörn Krieg weer se dat letzte Enn vun de Altonaer Straat.
Op de rechte Sied fangt wi woll an mit Nr. 36. Hett sick meist nich verändert, wahnt hebbt dar Gludsack, dann Lina Krause un nu ehr Dochter Isolde Stade mit ehrn Mann Willi.
Anners süht dat bi VW Köhler ut: In de twintiger Johrn hett Ing. Paul Weller de Buerstell vun Hagemann, de Vadder vun Johann un Ernst köfft. Dat lütt ohl Hus vörn hett noch stahn bit na’n Krieg denn is dor een smuck Walmdaghus but, un de Warkstäh in’n Stall weer modernisiert. Schwiegersöhn Köhler hett denn in de letzten Johrn allns wedder afreten un den riesigen Autohoff opbut.
Meist so güng dat mit Nr. 40. Dor stünn fröher sonn bannig lütte ohle Kaat von Hanneit mit een Schünendöör. De stürm jümmers sparangelwied open, un binnen weer denn Timmermann Köhnck mit een ohle Bandsaag bit Warken. Sien Söhn Hein weer bit vör kotten Polier bi Wolfgang Gülck.
Jo, na’n Krieg hett de ohl Vadder Winter dar een lütt Hus but. Dat weer ok later vun Söhn Gerhard afreten för een groot Hus mit Bowling bahn und Geschäft.
Nr. 42 stünm blangen bi bit düt Johr – een ohle witte Villa de opfallen de, wiel dat ni nich to uns Hüüs passen de, Dag grad afsneeden ohn‘ Giebel as sonn Bukassenprodukt. Se seggt, dor hett Wulf un een Lehrer Himmel wahnt. Nu baut Winter dor wat anners hen.
Jo, un Nr. 44 von Fru Schlüter is blots een beten üm- un anbut. Is veel bi rümdoktert worn, wiel de Wänn reten sünd bi den Stratenbu. Dor hett Hamann mit Kinner Lotti un Ewald, denn Hahne un Kurt Schlüter wahnt.
Nu dat Grundstück 46, dat hüt bannig anners utsüht. Vörn Krieg weer dat een Gornwirtschaft, de „Schützenhof“, gehörig to dat Wirtshus „Stadt Hamburg“. Hier hebbt de Vereine un dat Kinnervogelscheeten sik amüseert mit Lampignons. Vagelstang un Scheetstand achterbi, weer jümmers dat Enn vun de Festümtog. Villich heet de Weg blangenbi „Königsweg“, wiel de Schützenkönig dorlang müss. Na’n Krieg Aral-Tankstell un Getränkemarkt.
Anfang de dörtiger Johrn hebbt 4 Handwerksfamilien mit een Siedlungsgenossenschaft in Eegenarbeid 2 Doppelhüs för sick but: Dagdecker Franz Zechel, Timmermann Helbig, Muurmann Willem Loop un Topleger Möller. De staht hüt noch genauso.
Nr. 54 kennst awer nich wedder. Een Veerfamilienhus ut de dörtiger Johrn is dreemol so groot ümbut vun den Italiener Calabrese. Sogor een gläsern Vörbu wör genehmigt – den müch een Lastwagen nich lieden un is eben na de Inweihung midden rinföhrt.
Nr. 56 blangenbi hett Maler Paul Thies but. Later wahn dor Nicklisch De Hüs 58 vun Stau bit Nr. 66 Johann Sievers sünd meist nich verännert, wenn se ok all in de twintiger Johrn but weern: Stau (Amtsgericht), hüt Rolf Harbeck, Lerch( vun den Busbetrieb Rudi Prahl) hüt de Dochter Louise Wrage, Wragespedition, Dreyer (Amtsgericht). Ernst Clausen (Schlachter), hüt Dochter Lore Matthaia, un Maler Johann Sievers, hüt Hans Georg Ohly. De hett na achtern rut den Pensionstrakt anbut. Achter em weer kotte Tied een VK-Tankstell vun Göttsch, hett lang so leddig rümlegen, bit Behrends vör Johrn sien Tweeradladen un een Wertschaft dorhinbut hett.
De anner Stratensied beschnackt vi nästmol.
De Hamborger Straat – de anner Sied
vun Hans-Georg Koch
Dat geiht los an de Eck vun’n Köhlerhoff.
Dor wo nu dat grote Strohdackhus vun Unger steiht, weer fröher bit 1938 en grote witte Villa vun Familie Minden. De weer en Jud, de üm 1930 wechtrecken dä.
Dornah hebbt dor de Polizisten Haack un later Krüger wahnt. De niege Straat güng denn jüst över düt Terrain, sodat dat Hus afreten wör.
Brörsen hett denn dat scheune Strohdackhus buut, to de Tied wat ganz Besünners. Dann käm Fleßner, en Kommune vun junge Lüd un hüüt Unger, de dat Hus nochmal so lang anbuut un ut den lütten Stall to en groot Wahnhus mokt hett.
Jo, un denn kümmt de Köhlerhoff, awer dorvun will Ilse Lohse later wat vördreegen, wiel se dor noch mehr vun beleewt hett.
Wi gaht wieder achtern Ossenwech. Veele Hüs sünd in de letzten 50 Johrn ’n beten ümbuut worrn, awer se sünd all no bannig gliek bleewen. Wenn ick de Bewohners all optell, so wiel ji seker den een or annern no kennt vun fröher.
Dat Hus Nr. 33 is bewohnt worn vun Burmeister, Frl. Baade, Ernst Drohn, Walter Holdörp, Fru Kleeblatt, Harms un nu Dammers.
Nr. 35 Polizist Meinke bit 45, sin Fru ”Modder“ Magda Meinke mit Söhn Georg Wilhelm, de nu in Australien wahnt , un Dochter Ilse mit Mann Günter Pingel. Later hett Arnulf Pfeiffer, Söhn vun unsen Paster dat övernommen un hüüt Wolfhart Wiese.
Nr. 37 is denn dat oole “Hotel Stadt Hamburg“ – de Nam wür övernommen vun dat oole ”Stadt Hamburg“ an’n Bleeck. Besitzer weern Oldenburg, Theden, Therkorn, Bockwoldt sen. un jun., Jakobs vun de A-Koot. (Vör 8 Daag no ”Donnerwetter“ heeten, hüt “Bosborus“ vun en Türken.
Dat Hotel weer vör’n Jahrhunnert an son lütt ool Koot anbut worn, de eers no’n letzten Krieg afreeten wör. Dor hett Dackdecker Franz Zechel wohnt, de 1933 an de anner Sied vun de Straat but hett, wo sin Söhn Rudolf hüt no wahnt. 0k ’ne SHBV Tankstell vun Ernst Drohn weer dor no bit 19..?
Nu kümmt dat grote witte Hus Nr. 39 vun Werner un Marianne Rückert.
Ehrn Vadder Sniedermeister Korl Rückert hett dat but. Dütt un de annern dree Hüs hebbt sick gorni verännert.
Nr. 41 hebbt bewahnt Bebensee, Lembke, Edler, Schleger un hüt en Türke.
Nr. 43: Körz, Bliewernich, Schmidt, Fölster, Schröder.
Nr. 45: Fru Lau, Schwank, Helma un Ewald Hamann, Meyer (Doppelhus).
Nr. 47 weer fröher de eenzig Buernhoff an de Straat vun Rudolf Poggensee. He weer vun de Kaisermöhl. Later, he güng 1937 na Kiel, hett Veehhändler August Mohr dat övernommen un veel ut- un anbut. Op den Goorn an de Straat hett na ’n Krieg Kelle en Kfz.-Warkstäh un en Tankstell för sein Wagens but. Hüt is dor Krispin Abschleppdeenst un Gebruktwagenmarkt.
Bannig verännert hett sick denn dat nähste Grundstück. Dor hett in en grooten scheunen Park ne groote witte Villa stahn vun Dr. Gühne. Later weer dat ’ne Pension vun Matyba, Mews un Ahrens.
In de 70ger Johrn weer denn de Villa afreeten, un hüt is dor de Parkstraat mit veele hübsche Eenfamilienhüs.
Ook dorachter is denn noch fix but worrm, ne Weberie in lütte Pavillons un de groote Textilfabrik vun Ohlhoff, âNortex“ hüt in Niemünster.
Dat Hochhuus Kelle harr töerst ünnert Dack en scheunes Panorama-Cafe
Un denn de Golfanlaag un der Tennishall.
Jo, dat weer’t denn.
Hans Georg Koch
04.03.1998